д-р Богоевска Симона

Симона Богоевска е вонреден професор на Катедрата за теорија на конструкции и компјутерска анализа на Градежниот факултет во Скопје, при Универзитетот „Св. Кирил и Методиј“, специјализирана во областа на анализа на конструкции и идентификација и мониторинг на конструкции базирани на мерени податоци.

Дипломирала како првенец на генерацијата во 2009 година на насоката градежништво, по што ги продолжила магистерските студии со просек 10. Во 2011 година ги започнала докторските студии во рамки на SEEFORM Меѓународната докторска школа, DAAD. Докторирала во областа технички науки со највисока оцена (summa cum laude) во 2020 година на Универзитетот Рур во Бохум, Германија, со дисертација на тема дијагностика на ветерници базирана на холистички, податочни модели за мониторинг на здравјето на конструкциите. Нејзината работа била менторирана од експерти од Универзитетот Рур во Бохум, ETH Цирих и УКИМ Скопје.

Д-р Богоевска дополнително го надградила своето знаење преку истражувачки престои на врвни европски институции, вклучувајќи ги Техничкиот универзитет во Виена, Универзитетот Рур во Бохум и ETH Цирих. Таа е автор на повеќе од 40 научни публикации во областите на мониторинг на конструкции, анализа на вибрации и земјотресно инженерство и има менторирано шест магистерски трудови. Како признание за нејзината научноистражувачка извонредност, во 2020 година ѝ била доделена престижната награда „Професор Церна“ за најдобра докторска дисертација на Градежниот факултет при Универзитетот Рур во Бохум.